فسااااااااااااااااد

فساد ستان

طبعا العنوان مستعار من الكاتب الساخر أحمد رجب
ياترى هل أحمد رجب بيكره مصر؟
هل كل المدوّنين بيكرهوا مصر؟.. هل أكره أنا مصر؟
أقسم أنى أحبها وأتمنى ان تكون أحسن كيان في العالم
لكن كيف تكون؟ . . وكيف نتغاضى؟
وكيف نتوقف على التفكير والتحليل والتفسير والمقارنة؟
كيف نصم آذاننا ونبتر ألسنتنا.. ونعصب أعيينا؟
وكيف نصدق ما يُقال والفعل مغاير تماما؟
كيف نتعلم الصدق؟

**********

والله بحب مصر
رمسيس انتقل من مكان لمكان بعشرة مليون دولار والعربيّة اللي شالته اتكلفت نفس المبلغ بس بالجنيه
والجراج اللي في رمسيس اتكلف خمسين مليون جنيه والعبقري اللي اخترعه وصممه والفذ اللي أخد القرار ببناءه والجهابذة اللى اشتغلوا والفلاسفة اللي طبلوا بعبقرية المشروع ورؤية القرار وروعة التنفيذ اكتشفوا أنه بيشوّه جمال الميدان فكان القرار الاكثر عبقرية هو هدمه - بعد بناءه - وقبل ان تدوسه سيارة واحدة
واللي يغيظ ان هدمه هيتكلف عشرة مليون جنيه

**********

والله بحب مصر
انا مع الرأسمالية وتقسيم العمل وباعتبر آدم سميث ده عمي.. ومع الخصخصة ، بس بالذمة اللي بيحصل في البلد خصخصة
دي سرقة علني وبيع بالرخيص

**********

والله بحب مصر
باعونا لبتوع التليفونات والفاتورة لا تعبّر عن الاستخدام لسلعة من المفترض ان تزداد رخصاً كلما ازدادت تقدماً ولكن هيجيبوا منين مرتب سكرتيرة الباشا رئيس الشركة اللي بتاخد اربعتاشر الف جنيه فى الشهر والباشا يبرّر ده انها بتعرف سبع لغات

**********

والله بحب مصر
ده غير شركات المحمول واحتكار السلعة لصالح افراد السكة الحضيض ومترو النفاق اللي عرّفنا معنى عذاب القبر، وشوارع مدينة نصر كاملة الانارة صباحا، ومحطة مترو انفاق التحرير اللي مليانه صراصير كأننا واقفين فى بلاعة ، وشركات الأتوبيسات الجديدة ومهرجان القاهرة السينمائي

**********

والله بحب مصر
روح اي مستشفى حكومي.. وشوف التكديس البشري والاهمال الطبي والتنطيط من الممرضات والاتاوة على الابواب
شوف شوف الاتوبسات فى عز الظهر ، التذكرة باتنين جنيه ونفس المهانة
شوف البيّاعين على الرصيف والبلدية اللي بتطاردهم وعسكري المرور الغلبان اللي واقف في الشمس لحد ماتسيح راسه ومن غير ولا مليم

**********

عارفين احنا ليه نستحق نعيش؟

عشان بعد كل ده حامدين ربنا وبنحب مصر

**********